Kyrrðardagar Kyrrðarbænarsamtakanna

Á hverju ári bjóða Kyrrðarbænarsamtökin á Íslandi uppá kyrrðardaga, langa helgi eða vikudvöl þar sem lögð er áhersla á iðkun Kyrrðarbænarinnar, slökun, fræðslu, hvíld og/eða útiveru. Þá er á sumum Kyrrðardögum boðið uppá jóga. Kyrrðardagarnir njóta mikilla vinsælda og færri komast yfirleitt að en vilja. Áhrifin af Kyrrðarbæninni og dvöl í kyrrð í fallegu umhverfi skapa einstaka dvöl fyrir líkama, sál og anda. Það hefur einnig verið boðið uppá kyrrðardag um helgi. Þá er tekinn frá stakur dagur yfirleitt á laugardegi þar sem boðið er uppá kyrrðarbæn, kyrrð og hvíld. Kyrrðardagar fara að mestu fram í þögn en þó er oft boðið uppá biblíulega íhugun eða aðra fræðslu samhliða.

Hér áður fyrr voru kyrrðardagar yfirleitt haldnir í Skálholti sem var um nokkurt skeið nokkurs konar andlegt heimili þeirra sem iðka kyrrðarbæn. En síðustu misseri hafa verið haldnir langir kyrrðardagar á Löngumýri í Skagafirði að vori sem hafa verið gríðarlega vel sóttir. Þá hafa einnig verið haldnir kyrrðardagar langa helgi í Bergheimum á Sólheimum og í Kríunesi við Elliðavatn.

Árið 2026 bjóða Kyrrðarbænasamtökin uppá lengri Kyrrðardaga á Löngumýri að vori ásamt stökum kyrrðardögum í borginni þar sem tekinn er frá einn laugardagur.

 

Kyrrðardagar á Löngumýri

Kyrrðardagar á Löngumýri 30. apríl – 5. maí 2026

Það gefst gott rými og stuðningur á kyrrðardögunum við að skoða og dýpka sambandið við Guð (æðri mátt) með daglegum viðtölum í andlegri handleiðslu og sálgæslu sem Ingunn og Bára veita. Áhersla er lögð á iðkun Kyrrðarbænar og mikla þögn. Dagskráin, umhverfið og umgjörðin öll styður við kyrrðarupplifunina.

Viðtölin snúast um að hlúa að fólki á trúargöngunni í því umbreytingar- og þroskaferli sem hún hefur í för með sér. Í andlegri handleiðslu og sálgæslu mætum við fólki þar sem það er, hægjum á, hlustum og hlúum að eftir því sem andinn leiðir okkur til.

Langamýri í Skagafirði stendur í fallegu umhverfi við Varmahlíð. Aðstaðan er góð en á staðnum er bæði sundlaug og heitur pottur, kapella, notaleg setustofa, bjartur matsalur og fallegur garður svo eitthvað sé nefnt. Starfsfólk Löngumýrar hafa sýnt okkur mikla gestrisni og tekið einstaklega vel á móti okkur undanfarin ár.
Kyrrðarbænarsamtökin á Íslandi hafa staðið fyrir kyrrðardögum í allt að 15 ár og leggja alúð við að standa vörð um kyrrðina og að gera dvölina ánægjulega.

Umsjón: Ingunn Björnsdóttir og sr. Bára Friðriksdóttir.

Nánari upplýsingar veita: Ingunn Björnsdóttir í síma 8448816 og Bára Friðriksdóttir í síma 8919628 eða í gegnum kyrrdarbaen@kyrrdarbaen.is.

Sjá nánar